საქართველოს თავდაცვის მინისტრი და მისი მოადგილეები, ხელფასის გარდა, იღებენ საკლასო ჩინის, საიდუმლოს და სტაჟის დანამატებს. სწორედ ამით ხსნის თავდაცვის სამინისტრო იმ ფაქტს, რომ აღნიშნული უწყების პირველ პირს აქვს გასული წლის მანძილზე ყველაზე მეტი სახელფასო დანამატი მიღებული.
ინფორმაციის თავისუფლების განვითარების ინსტიტუტის (IDFI) ცნობით, 2013 წელს ირაკლი ალასანიამ სახელფასო დანამატის სახით მიიღო 83 076 ლარი.
საქართველოს პრემიერ-მინისტრის ბრძანების შესაბამისად, მინისტრის ხელფასი სახელფასო დანამატიანად თვეში 7875 ლარია, ხოლო წელიწადში- 94 500 ლარი.
როგორც თავდაცვის სამინისტროში განმარტავენ, აღნიშნული უწყების პირველი პირი და მისი მოადგილეები დამატებით იღებენ თანხებს. თავდაცვის მინისტრის შემთხვევაში, ეს არის საკლასო ჩინის დანამატი, ხელფასის ოდენობის (3540 ლარი) 35% (1239 ლარი), სტაჟის დანამატი 25% (885 ლარი) და საიდუმლოს დანამატი 15% (531 ლარი). ანუ ირაკლი ალასანია ყოველთვიურად იღებს პრემიერის ბრძანებით დადგენილ დანამატს (4335 ლარი) და სხვა დანამატებს (2655) ლარი, ანუ, ჯამში, 6990 ლარს, რაც წელიწადში 83 880 ლარია.
საერთო ჯამში, თავდაცვის მინისტრი წელიწადში ანაზღაურების სახით (სახელფასო დანამატებიანად) იღებს 126 360 ლარს, ანუ თვეში -10 530 ლარს.
სიახლეების გამოწერა
